श्री हरिदास नामावली

#रसिक शिरोमणि स्वामी श्री हरिदास जू महाराज नामावली ...
जिते स्वास नासा चले, तिते जपै हरिदास ।
तन मन प्रानन यौ मिले, ज्यों फूलन में वास ।।
श्री हरिदास गाउँ श्री हरिदास गाउँ ।
श्री हरिदास नाम गुन गाए गाए विपुल प्रेम पाऊँ ।।
श्री हरिदास नाम गुण रूप तन राऊं ।
श्री हरिदास प्रानन के प्राण जिवाऊं ।।
श्री हरिदास लैना श्री हरिदास दैना ।
श्री हरिदास भजे भैया कछु मै न ।।
श्री हरिदास द्यौसो श्री हरिदास रात्यौ ।
श्री हरिदास व्यौहार श्री हरिदास वात्यौ ।।
श्री हरिदास बल बुद्धि कुल जाति पांती ।
श्री हरिदास भेंटत सीतल भई छाती ।।
श्री हरिदास अंग बिन संग तजि सातौ ।
श्री हरिदास हिलग बिन हेत करि हातौ ।।
श्री हरिदास प्रेम बिनु नेम न सुहातौ ।
श्री हरिदास हित बोलत मिलत महल को नातौ ।।
श्री हरिदास नाम रूचि श्री हरिदास नाम सुचि ।
श्री हरिदास नाम लिए जाहि दुःख दोष मुचि ।।
श्री हरिदास कर्मै श्री हरिदास धर्मै ।
श्री हरिदास नाम बेधि लै मन मर्मै ।।
श्री हरिदास ग्याने श्री हरिदास ध्यानै ।
श्री हरिदास नाम करि कोटि स्नानै ।।
श्री हरिदास नाम मेरे मन्त्र माला ।
श्री हरिदास नाम मेरे मुद्रा तिलक भाला ।।
श्री हरिदास सेवा श्री हरिदास पूजा ।
श्री हरिदास भजन बिन भाव नाहि दूजा ।।
श्री हरिदास भक्ति रति श्री हरिदास परम गति ।
श्री हरिदास जसु गावत भई सुदृढ़ मति ।।
श्री हरिदास ब्रज रीति श्री हरिदास रस रीति ।
श्री हरिदास नाम लिए सकल साधन जीति ।।
श्री हरिदास निज दरस श्री हरिदास रस परस ।
श्री हरिदास सुख देत श्री हरिदास हित हेत ।।
अनन्य नृपति श्री स्वामी हरिदास निज दास ।
श्रीवर बिहारिनदास विलसत बिलास ।।
【 श्री कुञ्ज बिहारी श्री हरिदास 】
जय श्री राधे... जय श्री हरिदास